වැව් වදන් විවරණය ( තෙවන කොටස) - රළපනාව

ඔබ ශ්‍රී ලංකාවේ වියළි කලාපයේ විශේෂයෙන් මැයි මාසයෙන් පසු සැප්තැම්බර් දක්වා සංචාරය කර වැවක් අසල ටික වෙලාවක් ගත කර තිබේ නම් එය සිහියට නගාගන්න. විශේෂයෙන් පොසොන් සමයේ අනුරාධපුරයේ සංචාරයකර ඇත්නම් මෙය ඔබ නොඅනුමානව අත්විදින්නට ඇත.  මෙම කාලයේ මෙහි වැව් පිසගෙන එන සුළග ඔබට අමතක නොවනු ඇත. වැව් වල ජල තලයේ රළ නැගෙනා අයුරුත් වැකන්ද අසළ සුදු දු‍ඹුරු පෙන පිරී තිබෙනුත් සිහිවෙනු ඇත. මේ සිදුවීම වැවට වැදගත් වන්නේ මෙලෙස නැගෙනා රළ පහරින් වැකන්ද (වැව් බැම්ම) ඉතා තදින් සේදී යාමට ලක්වීමය. මෙය වැවේ ආරක්‍ෂාවට බලපෑමක් ඇති කරනා වැදගත් කරුණක් බව වැව් සැදු අපේ මුතුන්මිත්තන් තේරුම් ගෙන තිබුණි. මේනිසා වැකන්ද (වැව් බැම්ම) සේදීම වැව් බැම්ම දිගට කළුගල් ඇතිරීම මගින් වලක්වාලීමට හැකි බව වටහාගෙන තිබුණි. මෙම ගල් ඇතිරීම වැකන්දේ  (වැව් බැම්මේ) රළපෙන ඇතිවන කොටස ආවරණය කරනා බැවින් මෙය රළපනාව නමින් හදුනවන්නට ඇතිබව සිතිය හැක.